Lasarte-Usurbil BHI. Sagardotegiko menua aztergai
Sagardotegiko menua aztertu, eta aplikazio praktikoa egin dute Lasarte-Usurbil BHI institutuko Batxilergo Zientifikoko ikasleek, Laborategi Teknikak izeneko ikasgaian. Arrautza aztertzen hasi ziren; lehenik, zuringoaren eta gorringoaren koagulazioa, hain zuzen. Gero, alkohola erabiliz aztertu zuten, eta tenperatura beroarekin eta ur gaziarekin baita ere. Zuringoaren proteinak gogortzen eta koagulatzen nola joan ziren ikusi zuten.
Haragiaren kasuan, berriz, puntu egokia aurkitzen saiatu ziren; egiteko denborak aztertu zituzten, eta, kanpotik haragia zaporetsua izan dadin eta, aldi berean, samur gera dadin, tenperaturarik egokiena zein den zehaztu zuten. Haragia ongi egitea zaila dela esan zigun Mikel Martinez irakasleak, plantxa oso bero izatea komeni delako, baina barrutik haragiak ez duelako erre behar. Oreka bilatu behar da, eta horretan saiatu ziren ikasleak.
Muztioaren hartzidura ere egin zuten, eta esnekiak aztertuz, esnearen osagaiak bereiztu zituzten; gantzak, proteinak eta karbohidratoak. Gaztaren proteinekin itsasgarria egin zuten; itsasgarri zuria da, klasikoa, eta horrela egin daiteke. Eta aplikazio praktikoa ere egin zuten: izozki beroa lortzen saiatu ziren.
Bi hilabetean landu zuten guztia. Laborategi Teknikak ikasgaia hautazko ikasgaia da, eta, batez ere, kimikaren ikuspuntutik egin zituzten azterketak. Bederatzi ikasle aritu ziren iaz ikasgai horretan, eta elikadurarekin zerikusia zuen eta berezia zen zerbait egin nahi izan zuten; sagardotegiko menua aztertzea bururatu zitzaien, eta halaxe egin zuten. Horrela, sukaldean gertatzen den gehiena kimika dela ikusi dute.
