Blogak irakaskuntzan
Blogak “moda” bat baino zerbait gehiago dira. Interneten izan den “iraultzaren” motorra izan dira. Horien bidez, Interneteko erabiltzaileen artean komunikazio bide berria zabaldu da, informazioa eta ezagutza zabaltzeko eta partekatzeko filosofia berria eta, nola ez, irakaskuntzan dihardugunontzat gure ikas prozesuetan eragiteko aukera berria.
Zalantzarik gabe, 2005. urtea blogen iraultzaren urtea izan zen. Blogarien hazkundea izugarria izan da eta 80 milioi blog baino gehiago aurki daitezke orain. Horren ondorioz, blogen inguruan sortu eta garatu diren tresna eta aplikazioen kopurua, blogen garapenarekin batera, etengabe hazten joan da. Blogarien beharra asetzera datozen aplikazio horiek era guztietako eginkizunak betetzen dituzte: bideogintza, argazkigintza, musikagintza, testugintza…
Ikastaroaren lehen zatian, bloga sortuko dugu eta arestian aipatutako baliabideak ezagutuko ditugu. Baliabide horien eta blogen arteko uztarketa praktikara eramanez, blogek duten ahalmenaz jabetu eta irakaskuntzan egin dezaketen ekarpena aztertuko dugu.
Sarean topa daitezkeen blogen izaera anitza izanik, horietako asko helburu didaktikoekin sortu dira. Horiek dira, hain zuzen ere, edublog izenez ezagutzen direnak. Egia esan, ez dira gutxi blogak irakaskuntzan erabiltzeko egon daitezkeen arrazoiak:
1) Erabilerrazak dira.
2) Multimedia dira, alegia, testuak, irudiak, animazioak, ahotsak eta bideoak biltzeko euskarria eskaintzen dute.
3) Ikasleen partaidetza bultzatzen dute: metodologia eraikitzailearen barnean tresna eraginkorrak dira.
4) Gure egunerokoan erabiltzen ditugun beste hainbat baliabideekin konbinatuz, ikasleen konpetentziak lortzeko oso baliagarriak dira.
5) Blogak eta horien inguruan erabil daitezkeen aplikazio guztiak doakoak dira.
Blogaz gain, Web 2.0 berri horretan badira hezkuntzan erabilgarritasun aparta eduki dezaketen beste hainbat tresna. Horietako gehienak lankidetzan oinarritutakoak dira, informazioaren trataera era partekatuan gauzatzeko balio dutenak. Hor daude wikiak, portfolioak edota RSS jarioa oinarri duten aplikazioak, besteak beste. Horiek guztiek, taldeko lanean oinarrituta, ekoizpen mota askotarikoak lantzeko aukera aparta eskaintzen digute. Horrez gain, ikasleen artean ikuspuntu demokratikoagoa zabaltzea ahalbidetzen digute.
Azken hori izango da ikastaroaren bigarren zatian landuko duguna, hau da, zenbait ikasblog eredu aztertu eta eredu bakoitzak eskaintzen dituen aukerak baloratuko ditugu.
