Publisher:Idazketa tailerrerako baliabideak

Eskolak idazketan trebatu behar ditu ikasleak. Era guztietako testuetan trebatu behar ditu: narratiboak, informatiboak, azalpen testuak, instrukzio testuak… Halaber, beste nonbaitetik ateratako informazioa birmoldatzea, laburbiltzea eta antolatzea ere eskatzen diegu sarritan gure ikasleei. Helburu hori kontuan hartuta eta funtzionaltasuna tarteko, hainbat proiektutara jo izan dugu beti. Aldizkari, egunkari, triptiko, txartel, pankarta, horma-irudi… eta horrelakoez baliatu izan gara.

Azken urteotan horri guztiari beste erronka berri bat gehitu behar izan diogu; informazio eta komunikaziorako teknologiekin (IKT) bateratzea arestian aipatutako guztia. Hartara, bi helburu batera lortzekotan gaude. Batetik ikasleak idazketan trebatu, eta bestetik IKTak eguneroko irakaste-ikaste prozesuan erabili. Zer esanik ez, gainera, zer-nolako motibazioa izaten duten gure ikasleek IKTak erabilita. 

Publisher baliabide egokiena 

Aipatutako afera horretan Publisher programak paper garrantzitsua jokatuko du. IKTak eskolan sartzen hasi zirenetik ahal izan dugun moduan moldatu behar izan dugu, eta baita hainbat egoerei aurre egin ere, besteak beste, ekipo egokien falta, proiektu informatiko baten gabezia, irakasleen formazio falta, software mugatua… Idazketa lantzeari dagokionez, normalean Word programara jo izan dugu. Denok ezagutu izan dugun testu prozesadore bakarretakoa. 

Poliki-poliki eskola guztietan IKTen egoera hobetzen joan da, eta, une honetan sartzen da jokoan Publisher programa. Microsoft-ekoa izanik, daukan itxura oso ezaguna egingo zaioikasleari Wordenaren antza handia duelako. Gainera, ez dugu aparteko arazorik izango eskuratzeko, Office 2003rekin batera baitator. 

Ikastaro honetako ikasleak baliabide aberats bat aurkituko du Publisher programan. Word baino askoz ere egokiagoa da arestian aipatutako proiektuak aurrera eramateko orduan. Izan ere, Publisher maketazioak egiteko programa da. Bertan testu zein irudiekin erraz egingo dugu lan, Wordek horretan dituen mugak gaindituz. Modu berean, Wordetik zein Internetetik ekarriko ditugu testuak (edo irudiak) Publisherrera inongo arazorik gabe.

 

Eta nola ikasiko dugu Publisher erabiltzen?

Ikastaro honen metodologia erabat funtzionala izango da. Teoria praktikaren bitartez ikasiko du ikasleak. Horregatik, zenbait proiektu eramango ditugu aurrera, ondoren, gure ikasleekin egingo dugun modu berean. Proiektuak, gainera ,zabalak izango dira, hots, era sinpleago edo konplexuagoan burutu ahal izango dira norberaren gaitasun eta erritmora moldatuz. 

Ikastaroan aurrera eramango ditugun proiektuak honako hauek izango dira nagusiki: 

- Kartelak eta pankartak. 

- Liburuxkak. 

- Aldizkari edo egunkariak. 

- Argazki nobela 

- Argazki liburuxkak 

- …eta taldearen arabera sor daitezkeen beste batzuk ere bai.

 

Web 2.0ko eferbeszentzia garaian gaudela dirudi, papera desagertzear dagoela diote IKTko guruek. Egia esan, paperaren erabilera gero eta gehiago murrizten ari da posta elektronikoa eta Interneti esker. Hala ere, papera oraindik euskarririk egokiena da testu luzeak irakurtzeko eta ez litzateke zentzuzkoa izango egun batetik bestera baztertea edo kontuan ez hartzea. Betikoa, euskarri edo medio bakoitzak bere esparru edo funtzio beteko du eta guri egokituko zaigu, interesatzen zaigunaren arabera, bata edo bestea hautatzea, hots, papera edo pantaila.