Heziketa zientzietan doktorea da Malpica, eta irakaskuntzaren kalitaterako Scalae institutuaren kofundatzailea eta zuzendaria; baita gogoetazko praktikarako nazioarteko plataformaren talde bultzatzaileko kidea ere. Heziketaren eta irakasle prestakuntzaren kalitatean, berrikuntzan eta profesionalizazioan aditua da. Irakasle, ikertzaile eta aholkulari lanetan aritzen da munduko hainbat herrialdetako erakunde publiko nahiz pribatuekin, unibertsitate nahiz hezkuntza ministerioekin. Ikastolen Elkarteak gonbidatuta Euskal Herrian izan da Pedagogia 3.0. Berritu, eraldatzeko jardunaldien baitan “Gelan eta ikastolan eraldaketa emateko giltzarriak” izeneko hitzaldia eskaintzen. Ikastetxeetan berrikuntza-prozesuak egiteko bi baldintza bete behar direla dio: batetik, prozesu horiek kolektiboak izatea; eta bestetik, ikaslearen garapen osoan pentsatuta egotea.