SEASKA Haur Eskola, Beasain: nola bizi duten <br />plastika

1999-01-01
 
 
Esperientzia honen justifikazioa

Hezkuntza ekintza bihurtzeko orduan hainbat arlo esperimentatzen ditugu gure eskolan.

Hauetatik estetikaren heziketa da bereziki garatu izan duguna ondorengo mailetan:

a) Eskolarena, esparru estetiko bezala harturik.

b) Hezitzaileena, zenbait une berezitan gauzatzen ditugun lanak direlarik.

d) Haurrena, beraien esperientzia artistikoak direla eta.



Eskola, esparru estetikoa

Oinarri-oinarrizkoa da berau, eskola espazio eta txoko atsegin, alai, polit eta

esanguratsuz osatuta egotea nahi baldin badugu. Hau kontuan hartuta xehetasun guztiak

garrantzi handikoak bilakatzen dira. Argiak, apaingarriak, mugikariak, gortinak, hormen

koloreak, edredoiak, altzariak...hots, den-dena, eskola ingurune eder eta harmoniatsua

izan dadin.



Hezitzaileen lana

Guk geuk ere landu eta garatzen ditugu gure abildade artistiko eta estetikoak eskola

dekoratzeko mugikariak, hormirudiak eta abar sortzen ditugunean, baita haurren lanak

gurasoei erakusteko egiten ditugun karpetak osatzerakoan ere, Gabonetan edota ziklo

amaierako jardueretan.

Hauxe da beharbada, kanpotik begiraturik, gure ekintzarik ikusgarriena eta denboran

luzeen irauten duena.



Haurren esperientzia artistikoak

Haurrekin egunero burutzen ditugun ekintzak beraien esperimentazio eta

manipulaziorako trebetasuna garatzeko entrenamendutzat hartzen ditugu. Entrenamendu

hau esanahitsua, sentsoriala, motorea, komunikaziozkoa eta adierazgarria izatea nahi

dugu.

Gure lanean arlo asko ukitzen ditugu ahalik eta ekintza eredu globalena gerta dadin.



Helburu orokorrak

Plastikaren inguruko ekintza hauekiko jarrera baikor eta partehartzailea bultzatu eta

ekintza hori gustukoa bilakatuz haurrek goza dezaten nahi da.

Honekin batera beste xede hauek ere zaintzen ditugu gure ekintzetan:

-Garapen sentsoriala (ukimenarena, ikusmenarena, entzumenarena..)

-Garapen psikomotorea (eskuen kontrola, koordinazioa, disoziazioa, errotazioa...)

-Garapen kognitibo-adimenezkoa (kontzeptuak: koloreak, neurriak eta formak,

aldaketen pertzepzioa, ehundurak...)

-Garapen sozio-afektiboa. Elkarri lagunduz lan egiten duen talde bateko partaide dela

sentitzea nahi dugu; lan bat sortzeko eta burutzeko gai dela sentitzeko moduko giroa

sortuz bere autoestimua lantzea; bere sortze-lanak besteei erakusteko eta emozioak

azaltzeko gogoa izatea; autonomiaz jabetzen joatea margoak eta materialak bere

aukeran utziz eta bere hiztegia zabalduz beren esperientziak azaltzen treba daitezen.



Bitartekoak

- Eskuak

- Margoak (plastidecor, argizariak, klarionak, pastelak, tenperak...)

- Plastilina

- Buztina

- Bestelakoak (guraizeak, linternak, azukrea, txokolate-hautsa, fruta, hostoak, harriak,

loreak, zaborretarako materiala...)

- Paperak (pinotxo, zelofan, zetazkoa, landare-papera, ebakinak, aldizkariak, orriak,

gometxak, kartulinak...)

- Irudiak (Mirórenak, Van Goghenak eta abar...)

- Tresnak: isipuak, neurri ezberdinetako espumazko arrabolak, sprayak...)



Metodologia

Hautatutako egunetan egiten dira plastikako saioak baina ez beti espazio berberean, ez

eta euskarri berdinetan. Mahaiak, zorua, plano okerrak nahiz horizontalak tartekatzen

ditugu plastika jarduera hauetan.

Materiala beren eskura egoten da eta haur bakoitzaren erritmoa eta nahia kontuan

hartzen dugu. Horregatik, materialaren erabilera guztiz librea da, nahiz haurrengan garai

bat egon, 12-14 hilabete betetzean janariekin esperimentatzen eta manipulatzen hasten

direnean, non hezitzailea imitaziorako erreferentzia bihurtzen den eta, hori dela eta,

plastika saioa zuzenduxea bihur daitekeen.

Hiru zatitan bana dezakegu saio bateko prozesua:

- Materiala eta eszenatokiaren prestakuntza

- Jarduera (haurrak nahi duen adina luzatuko da)

- Lanen erakusketa. Haur talde batek egindako ahaleginak erakusteko balioko digu

erakustaldiak. Beren lanak ikusgai egotea nor bere buruaren eta besteenaren

identifikazio garapenerako ere baliogarria da eta, azkenik, eskolaz kanpoko lotura

sortzeko ere, kasu honetan familiarekin, oso tresna deigarria bihurtzen da.

Plastika saioak erritmo ezberdinetako musikaz girotzen ditugu. Hasieran haurrak

motibatu nahian erabiltzen dugu musika; gero, jardunean ari diren bitartean, erritmoaz

jabetzeko eta, lana amaitu ondoren, erlaxatzeko eta lasaitzeko.



Ondorioak

Urteotako lanak erakutsi digu bete-betean asmatu genuela plastika saioak gure

programan txertatzearekin. Gure Haur Txikien Eskola gu denok, handi eta txiki,

errepresentaturik gauden erakustoki zabal bat da. Koloreekin, bolumenekin eta

argiarekin jolastuz gure imajinazioa gainditzea ahalbidetzen duen unea da hau; hartu,

eman, begiratzen ikasi eta artea landuz gozatzeko unea, alegia.