2004ko uztaila: V. Hik Hasi Udako Topaketa Pedagogikoak

Uztailaren lehen bi egunetan izango dira V. Hik Hasi Udako Topaketa Pedagogikoak Donostian, hik hasik eta EHUko Hezkuntza Zientzien Fakultateko Hezkuntzaren Teoria eta Historia Sailak antolatuta. Ikasturte amaierako osagai bat gehiago bilakatu dira dagoeneko, eta horren lekuko dira parte hartuko duten 700 lagunak. Neska-mutilik gabe eta gremioko beste lankideekin elkartuta, gehiago ikasteko, bizitzeko eta esperimentatzeko gogoz daudenak, denak ere.

31 ikastaro jarri dira aukeran aurten, eta batzuk aurrera aterako ez badira ere jende gutxik eman duelako izena, beste batzuk gainezka egin dute, hala nola;"Zer egin dezakegu gelan haur hiperaktibo eta arreta gabeekin?", "Ordenagailuaren erabilera musika gelan", "Neobook", "Klarionatik sagura", "Ipuinak nola kontatu", "Haurrentzako masajea" eta "Psikomotrizitatea". Interes asko piztu dute "Estresa irakaskuntzan: irakasleak eta ikasleak", "Idatziko hizkuntzaren trebaketa prebentiboa", "Heriotza heziketan" eta "Bideoa"ikastaroek ere, eta gisa berean informatikakoek. Espezializatuagoak diren beste eskaintza batzuk ere egin ditugu, taldea osatzerakoan zailtasunak izateko arriskua ikusi arren, interesgarria iruditzen zaigulako ekarpen askotarikoei atea zabaltzea. Urteroko apustuak izan ohi dira.

Ikastaroen artean bada indar berezia eman nahi izan diogun bat: "Modenako (Italia) 0-6 udal haur eskolak". Adin horretako haurren heziketa eta asistentzia hizpide izan dira azken urteotan eta 34 urteko esperientzia duten italiarrek zer kontatua izango dute. Ongi funtzionatzen duten eskolak dira, herrian erreferentzia bihurtu direnak, eta guretzat baliagarri izan daitezkeen hainbat gauza azalduko dituzte.

Aldaketen artean, ordutegiarena aipatu behar dugu. Izan ere, ikastaroak bi egunetan eta goiz eta arratsaldez egingo dira aurten, egutegi kontuak direla-eta horrela moldatu beharra egokitu delako. Izango da aurreko urteetan bezala hiru egunetan eta goizez soilik egitea nahiago duenik, eta baita bi egunetan goiz eta arratsaldez egiteari abantaila gehiago ikusten dionik ere. Zuen iritziak kontuan hartuko ditugu hurrengo urteetarako, denon artean ahalik eta zukurik gehien ateratzeko topaketei.

Beste behin ere, ikasteko aukera emateaz gain, elkartzeko eta biltzeko gune bat eskaini nahi izan dugu, topagune bat, alegia. Seguru gaude denon artean giro ezin hobea sortuko dugula eta elkarrekin gozatzen eta ikasten asmatuko dugula.

2005eko uztaila: VI. Hik Hasi Udako Topaketa Pedagogikoak

Uztailak 4, 5 eta 6. Egun seinalatuak izango dira Hik Hasirentzat eta inguruan bilduko diren guztientzat. Batetik, VI. Hik Hasi Udako Topaketa Pedagogikoak egingo direlako Donostian. Eta bestetik, Hik Hasi aldizkariaren 100. zenbakiak argia ikusiko duelako.

100. alea kalean izateak Hik Hasik 10 urteko ibilbidea egin duela esan nahi du. 10 urte. Inork gutxik uste zuen hainbeste iraungo zuenik. Beharrezkoa ikusten zen euskal heziketari edo irakaskuntzari buruzko aldizkari bat edukitzea. Askok somatzen zuten horrelako tresna baten premia. Baina aldi berean, apustu zaila edo bideragarritasunik gabea zela uste zen orokorrean. Inork ez zion etorkizun handirik ikusten.

Urteak pasa ahala, uste hori bere horretan gelditu da; usteak erdia ustel. Aldizkaria hilero-hilero iritsi da ikastetxe guztietara eta harpidedunen postontzietara. Azken horiekin gogoratzen gara bereziki 10 urte pasa eta gero. Hik Hasi proiektuaren oinarrizko zutabe zarete zuek, harpidedunok, eta bihotzez eskertzen ditugu zuen ahalegina eta babesa.

Aldizkariaren inguruan beste hainbat proiektu eta ekimen ere sortu dira, eta horietako bat Hik Hasi Udako Topaketa Pedagogikoak. Aurten seigarren aldiz bilduko gara Donostian ikastaro sorta baten inguruan. Ikasturte amaierako lanaren zama arinduta, beste umore eta filosofia batekin elkartzen gara urtero.

Beharrak eta gabeziak ikusita, eskaintza zabala eta anitza egin dugu aurten ere, interesak ere hala baitira. Eta betiko gure erronkari eutsiz, nola ez: euskarazko ikastaroak izatea. Oraindik ere gaztelaniaz edo frantsesez eskaintzen diren ikastaroak gehiago dira, eta euskal irakaskuntzan euskaraz lan egiten dugunez, funtsezkoa iruditzen zaigu prestakuntza ere euskaraz jasotzea. Horra hor Hik Hasiren erronka eta ekarpena.

Lanaren ondoren atseden hartzea gogoko izaten dugu, eta elkarrekin posible bada, hobe. Asmo horrekin antolatu dugu aurten ere azken eguneko bazkaria. Boligrafoa, papera eta ordenagailua utzi, eta platerak eta edalontziak dituen mahaiaren inguruan biltzeko aukera dugu. Ikastaroan ikasitakoak komentatzeko, besteei erakusteko, haiek egin dutenaren berri jasotzeko eta beste hamaika kontutarako tarte aparta ematen du bazkariak eta bazkalosteak. Ondo hasitako gauzak ondo bukatu behar omen dira. Eta 10. urte honek merezi du.

2006ko uztaila: VII. Hik Hasi Udako Topaketa Pedagogikoak

2006ko uztaila: VII. Hik Hasi Udako Topaketa Pedagogikoak

Uztailaren 4, 5 eta 6ean (asteartetik ostegunera).

2007ko uztaila: VIII. Hik Hasi Udako Topaketa Pedagogikoak

2007ko uztaila: VIII. Hik Hasi Udako Topaketa Pedagogikoak

Uztailaren 3, 4 eta 5ean (asteartetik ostegunera).