Haur eta Gazte Literaturako lehen azoka egingo da Saran

2021-10-08

Urriaren 8an eta 9an egingo da Saran IkusiMakusi Haur eta Gazte Literaturako azoka. Azokaren lehenengo edizioa 2020an egitekoa zen, baina COVID-19a dela eta, 2021eko urrira atzeratu behar izan dute. Kiribil konpainiak, Pamiela argitaletxeak eta Galtzagorri Elkarteak antolatutako liburu-azoka da eta urtero egiteko asmoa dute. Urriaren 8a eskolen eguna izango da eta 9a familiena. 

 
 
Haur eta Gazte Literaturako  lehen azoka egingo da Saran

Azokaren baitan, lehenengo eguna ikasleei eskainia izango da eta Euskal Herri osoko ikastetxeetako haur taldeak bertaratuko dira. Bigarren egunean, familientzako ekintzak prestatu dituzte.

Azokako espazioa, jarduerak eta ikuskizunak haurrei nahiz gaztetxoei zuzendutakoak izango dira. Euskal lurralde guztietako literatura arloko profesionalak ere bertan izango dira: argitaletxeak, idazleak, ilustratzaileak, liburu-saltzaileak, bibliotekariak, ipuin kontalariak eta artistak.

Hala, Ikastetxeen egunean (urriaren 8an) ikasleek euskaraz idatzitako liburuak, idazleak eta ilustratzaileak ezagutzeko aukera izango dute eta ikuskizunekin nahiz sortzaileen aurkezpenekin gozatuko dute.

Familien egunean berriz (urriaren 9an), irakurketa, idazketa eta sorkuntza munduan murgilduko dira haurrak euren guraso edo zaintzaileekin batera. Horretarako, euskarazko liburuaren inguruan, ekintza ezberdinak antolatu dira: umeek liburu txokoez gozatu ahal izango dute, argitaletxeen standetan ibili, animazio-tailerretan parte hartu, egun osoan zehar ikuskizunak ikusi, idazle eta ilustratzaileek egindako mintzaldiak eta aurkezpenak entzun ...

Helburua euskal Haur eta Gazte Literatura plazara jalgi eta haren berri zabaltzea da. Halaber, ume txikiei, haurrei eta gazteei irakurtzeko, kondairak entzuteko, hitzekin jolasteko eta idazteko aukera ematea eta euskarazko albumetan eta liburuetan murgiltzea. Bide batez, Haur eta Gazte Literaturaren eremuan lanean ari diren euskal profesionalen ekitaldi-topaketa sortu nahi dugu.

Azokako ikuskizun zein tailerretan parte hartzeko, aurrez izena eman behar da, lekuak mugatuak baitira.