Haurrekin esperimentazioan sakontzeko liburua argitaratu du Hik Hasik

2020-12-14

HUHEZIko Hazitegi ikerketa-guneko Larraitz Esnaolak eta Alexander Barandiaranek egin dute ‘Esperimentazioan sakonduz BIZIBERRITU’ liburua, eta hezkuntzan eta garapen-prozesuan askotariko materialekin esperimentatzeko aukera izateak zer-nolako onurak ekartzen dituen aztertzeaz gain, esperimentaziorako hainbat ideia, estrategia eta proposamen biltzen ditu liburuak, pausoz pauso dokumentatuak.

Dagoeneko salgai dago Hik Hasiren webgunean, harpideentzako prezio bereziarekin.

 
 
Haurrekin esperimentazioan sakontzeko liburua argitaratu du Hik Hasik

“Hezkuntzan umea erdigunean jarri, eskuliburuak alboratu eta proposamen berriak lantzen hastean, galdera berriak sortzen dira: zeren arabera proposatzen dugu espazio jakin bat, eta espazio horretan, material bat edo bestea? Zer ekarpen egiten dio material bakoitzak umearen garapenari edo garapenaren esparru bati edo besteari? Espazioek eta materialek esperimentatzeko, manipulatzeko, esploratzeko, sortzeko eta jolasteko ateak irekitzen dizkiote haurrari. Prozesu horretan bidelagun den hezitzaileari laguntzeko sortu da liburu hau, hausnartzen eta bide berriak irekitzen laguntzeko. Askotariko materialekin esperimentatzeko eta biziberritzeko hainbat ideia eta estrategia biltzen dira, 365 proposamenekin batera.

Inspiratu, esperimentatu eta sortu!”

 

Bizi gara, gure munduan, gure moduan.
Bizi gara, materialen munduan, material soilen munduan.
Materialak bizi gaitu.
Materialekin bizi gara soiltasunez beteriko munduan.
Gure munduan eta gure moduan.
Aukera berriei atea irekiz, esperimentatuz, proposatuz, sortuz.
Gure munduan eta gure moduan.

 

Egileak:

Larraitz Esnaola Illarreta

Haur Hezkuntzan Graduatua eta Hezkuntza-erakundeetara bideratutako Berrikuntza Didaktiko Metodologikoko Proiektuen garapena eta kudeaketa unibertsitate masterrean formatua. MUko HUHEZI fakultateko irakaslea Haur Hezkuntzan eta Hazitegi ikerketa taldeko kolaboratzailea. Haurren parte hartzean oinarritu tako “Sorleku” jolas eremuaren eta “Bizi bizia berhezi” proiektuaren egileetako bat. Haur eta Gazteen Aisialdian formatua eta aritua. Haur Hezkuntzaren munduarekin liluratua eta askotariko materialek eskaintzen digutenaren inguruan interesatua.

 

Alexander Barandiaran Arteaga

Psikologian doktorea, psikoterapia humanistan formatua eta aritutakoa, 20 urtetan irakasleikertzailea eta MUko HUHEZI fakultateko irakaslea eta Hazitegi ikerketa taldeko koordinatzailea. Haur Hezkuntza eta Lehen Hezkuntzaren inguruko hainbat tesiren zuzendaria, Haur Hezkuntzaren inguruko hainbat artikulu eta libururen egilea, eta Hik Hasiko eta Hazi Hezi aldizkarietako kolaboratzailea. Pertsonaren garapenean eta Haur Hezkuntzan aritua eta maitemindua.

Albiste gehiago